政情：中環靚地象徵式租金 「殖」情益香港會

香港會嘅會籍門檻高，即使財雄勢大都未必咁易入到會，要做會員可以話係「爭崩頭」。阿Paul喺質詢中指出，香港會現址係港英政府喺百多年前以年租324元批出，後來該會喺1980年代初同私人發展商達成協議，由後者出資重建原會所為樓高21層嘅新大廈，以換取出租大部分樓層嘅租金收入。佢又指香港回歸之後，會所作殖民地時期英國官商聯誼場所嘅用途已經唔存在。況且該會會員一直只有約1,500名，關注政府會否考慮用一個會員資格開放予所有種族、社會階層人士嘅會所取代香港會。

不過發展局書面回覆時就話，該地契屬舊式無限制批約，年期由1894年2月20日起計999年，除只有不用作厭惡性行業嘅條款外，並無其他限制。至於有冇考慮向香港會提出換地建議，騰出會所佔用嘅珍貴用地作重新發展，以便將所得收益用於紓緩政府破紀錄嘅財政赤字。發展局就話政府只會喺非常特殊且具充分政策理據嘅情況下，例如保育個別特殊土地或建築物，先至會同土地業權人商討非原址換地，而香港會用地並唔屬於呢類情況，又話相信任何土地業權人都唔會輕易放棄位處中環「商業」用途地帶嘅土地。

見到政府咁嘅回應，阿Paul就話政府似乎冇動腦筋，去思考點樣處理港英時期遺留落嚟嘅問題，畀外界感覺政府唔敢掂，令社會甚至內地官員都認為香港官員仍保留殖民地思維。佢仲舉例話特別喺「五眼聯盟」打壓下，政府都冇強硬立場。對於有啲官員都會加入某啲會所做會員，阿Paul就認為依家政府咁重視國家安全，認為應該要求官員申請會籍時應考慮香港整體利益。