政情：郭俊峯升任入境處副處長

今年52歲嘅郭俊峯早喺1989年9月，加入入境處做助理入境事務主任，一直平步青雲。郭早年係入境處「偽證專家」，亦曾經做過海陸空口岸及簽證管制，曾被借調往保安局同公務員事務局。

郭俊峯之後更派駐香港特區政府駐北京辦事處，主管入境事務組，回港後又派駐過反恐科，係「跨部門反恐專責組」嘅入境處代表。喺2020年更加晉升做助理處長，負責管理所有口岸。

佢入職32年期間，曾先後調派往英國、法國、北京等地學習，吸取經驗，又曾喺澳洲蒙納士大學（Monash University）兼讀商業學士學位課程畢業，喺2007年獲得港大公共行政管理碩士學位。