政情：反對派唱衰中港 建制組外宣聯盟力抗

聯盟召集人之一、前區議員李梓敬話，香港反對派同埋唔少外國媒體用大量文宣抹黑國家，舉例話涉嫌違反《港區國安法》被警方通緝、現流亡英國嘅前香港眾志常委羅冠聰同埋前民主黨議員許智峯等人，使用貼近西方受眾嘅社交媒體，所以建制派亦應該「追落後」，建議聯盟喺社交平台同英文媒體發文，避免涉港嘅意見一邊倒。

佢又話2019年區議會選舉前後，出現唔少針對建制派嘅文宣，建制陣營不但有理說不清，且網絡宣傳工作太弱，及後部分人喺網上發言，令到輿論不再一邊倒，加上持續發聲得到市民支持，建制派喺網絡上嘅視頻點擊率或者瀏覽量已經同反對派製作嘅視頻差唔多喇。只不過，由於國際輿論仲未有所轉變，佢哋呢班青年就打算打「國際線」。唔單止咁，佢哋打算自發出席聯合國人權理事會會議發言、出席英文論壇、喺各報章投稿，等西方媒體有更多可訪問嘅對象咁話喎。

另一召集人、青年發展委員會委員林琳，就對某女歌手前年喺聯合國人權理事會指摘港府同國家，感到相當不滿。但佢強調見到唔公平嘅地方就要有人發聲，形容為「唔忿氣嘅話自己嬲都好傷身，不如講出嚟畀大家知啦」，於是佢去年亦遠赴聯合國發言道出真相。林琳話好多外國人其實唔係太了解香港所發生嘅事，但有人自詡正義化身，竟將假嘅事講得理直氣壯，不單止做成誤導，更會影響到海外華人嘅團結。

區議員楊哲安亦都係召集人之一。佢話西方人對中國嘅評論往往帶有偏見，舉例指年僅14歲嘅跳水運動員全紅嬋喺剛過去嘅東京奧運奪得金牌，旋即惹起西方輿論質疑全是否遭到國家強迫參賽。但楊清楚記得英國過去亦曾派出14歲嘅運動員出席跳水賽事，但西方輿論就只有讚美言詞。西方嘅雙重標準令佢「有團火」，認為必須以西方人明白嘅語言去講述真實嘅香港情況同中國故事。