政情：參選鬧劇 鴿啄鴿 沒完沒了 搞提名 拖泥帶水

羅尋日喺電台節目上解畫，話有黨員喺會上提出因依家無人表態參選，倒不如制訂機制，再交由特別會員大會決定。佢話希望決定令該黨更團結，可以走足黨內民主程序。至於有學者形容今次決定屬曖昧做法，料係為咗等所有區議員宣誓被裁定有效，佢就話唔會特別估計邊個有機會參選，強調係因應政治形勢變化，做最好嘅決定。由於召開會員大會甄選參選人，需要最少14日前通知，佢預料黨內會於10月初或最遲10月中截止報名。

曾表明該黨若棄選將退黨嘅李華明對於呢個門檻就好似有啲不滿喇！佢話唔明白點解喺咁緊迫時間下，仲要提高門檻，又認為有機會參選嘅黨員知名度較低，認為明顯係為佢哋帶嚟難題。至於如該黨最後無人參選應否解散，佢就話屆時再思考。其實白鴿黨今次嘅決定都真係令人出乎意料，唔理今次決定係咪想故意刁難呢班有意參選嘅「潛水」黨員，但呢場「鴿啄鴿」之爭有排都未可以落幕。