政情：聯合國人權會議 林琳斥外國勢力想摧毀香港

林琳指唔少外國政客評論香港事務之時，話會同香港嘅年輕人喺一齊，跟住就煽動年輕人應該要同自己嘅政府為敵、憎恨自己嘅文化，又指香港唔再適合居住、制度已經唔可信。林琳話呢啲說話令人好惡心，但諷刺嘅係有啲國家嘅商會竟斥巨資喺香港設立永久辦公室。佢又提到自己喺2019年曾接受唔少外國媒體嘅訪問，但係呢啲視頻、新聞片段，甚至係個人分享竟突然消失，直指係被打壓，質疑某啲國家話要擁抱民主同言論自由，根本係講一套、做一套。

至於新冠肺炎肆虐全球近兩年仲未結束，佢認為原因係缺乏國際合作，又反問：「我哋到底要嘅係戰爭？定係和平呢？」佢促請各國政治家同領導人停止製造衝突，並着手帶領其國家擺脫挑戰。佢問國際間係咪仲要糾結於「你必須要遵守我嘅規矩，否則我就毀了你」嘅心態去處事呢？抑或係時候尊重彼此嘅文化、歷史同規矩呢？