政情：黃之鋒監獄長踎 學懂適應

前日係中秋節，所謂每逢佳節倍思親，黃都喺獄中寫咗封信，話要分享一下點樣喺苦難裏頭自處喎。信中佢指喺低潮入面有各式各樣嘅念頭或者情緒萌生都係正常嘅，唔需要逞強咁話無畏無懼、急於打倒昨日嘅自己、又或者否定過去，都可以學習吓同恐懼共存嘅。不過佢強調，最重要係「要適應但唔好慣」，都坐咗監咁耐，佢終於先學識點適應啊。

同樣正被還押，涉去年35+初選案嘅何桂藍，前日中秋節都有貼文，指前年9月佢同黃之鋒等人一齊去紐約訪問，期間喺紐約中央公園過中秋節食月餅。兩年過去，物換星移，兩人同樣都失去自由，只可以話早知今日何必當初呢？

鐵窗生活當然唔好過，反觀黃之鋒嘅「戰友」、被通緝嘅前香港眾志常委羅冠聰，日前由英國去咗美國，與學聯前秘書長周永康，以及包括前「民間外交網絡」發言人張崑陽在內等幾個流亡美國嘅人士，喺華盛頓相聚一齊過中秋節，簡直係優哉悠哉呀！

雖然黃下個月先滿25歲，但就已經兩度繫獄且案底纍纍。目前佢已經服畢前年6‧21非法圍堵警察總部，被控組織未經批准集結罪，煽惑他人明知而參與未經批准集結嘅刑期，但都尚餘4個月嘅前年反蒙面法遊行，被判非法集結、在未經批准集結中使用蒙面物品，同埋10個月嘅去年6‧4晚會非法集結刑期。之但係，佢因去年35+初選案，涉觸犯《港區國安法》嘅案件，今日至開始提訊，要應付呢場官司真係漫漫長路，恐怕有排都見唔到盡頭。

就連黃自己都曾經委託律師向朋友畀口信話「可能再見時，我哋已經三十幾歲。」莫非佢已經打定輸數，預咗自己喺監倉要「再坐一會」？屆時年過30嘅黃之鋒，仲有冇可能喺政壇打滾呢？