政情：東廊行人板道拖逾8年先拍板議員想多啲嘢玩

質疑16.8億太貴促加闊搞活動注活力

立法會工務小組委員會尋日開會，通過有關興建東區走廊下建行人板道，拖延逾8年終確定建造連接炮台山油街至鰂魚涌海裕街、全長2.2公里嘅行人板道設計。但會上就有議員指出項目根本唔涉及複雜工程，批評行人板道16.8億元造價太貴。更有議員建議加闊行人板道，方便市民進行唔同活動，注入活力咁話。

議員何君堯指，擬建嘅行人板道喺東區走廊下方興建，共2.2公里長，闊度只有10米，認為太窄。佢又提到興建東區走廊板道唔涉及複雜工程，指觀塘興建長120米嘅高架園景平台只需要2億多元，對項目16.8億元造價感到詫異，要求政府提供工程開支詳細資料，以解釋行人板道昂貴造價。

學黃金海岸擺檔賣手工藝

另有多名議員同樣話要擴闊板道，當中包括議員梁美芬，佢提到加闊海濱長廊可以容納唔同活動，為海濱長廊注入生命力，例如可以倣效以往屯門黃金海岸做法，設置售賣手工藝品攤檔等。

議員張宇人同樣要求當局擴闊板道至15米，使板道可有足夠空間讓個體戶經營小食店，製造就業機會之餘，行人都可以得益。

發展局副秘書長丘卓恒就話，由於今次興建行人板道並唔需要額外建造橋墩，利用場地優勢，因此東區走廊行人板道每平方米建築成本實際上約6萬元，對比起位於荃灣灣景廣場行人天橋，每平方米造價約56萬元，當局今次項目利用場地優勢，已節省了不少成本，可以用約17億元嘅價錢建造2.2公里長嘅東區走廊行人板道實屬便宜喎。

佢又重申當局視未來海濱長廊嘅管理為新機會，希望引入營運者舉辦唔同活動，增添生命力，仲話行人板道至少闊10米，有6米闊度用作動態活動，包括踏單車及跑步，其餘位置可以用作靜態活動，好似釣魚等，相信闊度足夠咁話。

政府自說自話似唔肯讓步

聽到呢度，即係議員有議員講，政府有政府講，總之你話造價貴，我覺得已經好平，你話板道唔夠闊，我覺得已經夠闊，似乎都唔會有任何退讓或者修改。單單工程規劃就耗時超過8年先提交立法會審議，現時又問題多多，究竟點搞好呢？