政情：政府冇嘢講 經發委會議泡湯

立法會各個事務委員會每個月有一次例會，理應係政府官員同議員溝通嘅機會。之不過經濟發展事務委員會主席張華峰（肥老闆）話，詢問商務及經濟發展局之後，對方話冇咩特別議題可以傾，至於一眾議員都冇提出特別議題，於是決定取消原定喺本月27日舉行嘅會議喇。但係前海方案、跨境理財通等都喺近日公布詳情，真係冇嘢好傾咩？肥老闆解釋話，即使其他會議同經濟事務無關，其實議員都已經喺唔同會議上提出關注喇。