政情：暴潮拖累 申撥建科研大樓撞板 中大鬼祟再闖關

身兼中大校董嘅議員麥美娟，對於項目嘅態度轉趨軟化。佢提到中大校方撤回項目之後都有再向議員詳細介紹實驗大樓用途，強調主要係科研之用，而立法會同社會亦都一直關注各大院校發展，所以促成項目重上立會，希望中大可以盡快興建國家級實驗室。

中大近來喺校園入口設入閘機，要求師生進入校園前拍卡，未能拍卡或者校外人士就需要登記，門口仲有保安員查核證件。中大落實出入管制措施，似乎係為重闖財會鋪路喎。麥美娟提到以前喺中大讀書，都冇諗過校園會有大量外人進入，導致出現反修例風波時嘅危險場面，認同校方採取措施強化保安，可以保障學生，期望可以進一步加強管理。

同樣係中大校董嘅議員劉國勳亦指，中大校方自撤回項目後，期間就議員關心嘅情況進行適當調整，亦一直有聯繫議員解說以爭取支持。劉國勳認為中大管理層有決心改變，無論係保安或校園管理等等，都令大家放心，佢亦明言自己會支持項目。

睇番轉頭，財委會原定喺今年2月開會審議有關項目，但係中大突然喺前一日撤回項目，話由於部分議員對中大處理前年社會事件嘅工作，以及事後提升保安措施嘅詳情表示關注，決定暫時撤回撥款申請，爭取更多時間向議員解說。當時中大已經講明爭取喺今屆立法會會期內，再將撥款申請提交財委會。當時就得番審議喺香港大學校園興建一座科研實驗大樓以及一座資訊科技大樓，涉款約11億元嘅項目。