政情：睇見都肉赤胡健民座駕被撞凹

大家成日講破財擋災、化解凶煞。建制派政黨嘅大埔支部主席胡健民都同意呢個講法，事關佢突然發現泊喺停車場架座駕被人撞凹咗，都話覺得肉痛，不過佢形容自己比較「阿Q精神」，最緊要係人冇受傷。

「躺着中槍」隔籬車主自首

胡健民喺社交網站分享照片，見到佢架藍色Tesla私家車車頭變形、撞凹咗，佢提到自己係「躺着也中槍」，請隔籬車位嘅司機下次出車時，睇清楚啲先好。原來係隔籬車主唔小心撞到胡健民架車，不過都即刻「自首」，願意賠錢。胡健民話都唔太擔心錢銀問題，事關保險會受理，只係最近就要搵過第二架車代步喇。佢亦提到眼前嘅問題可以用錢解決，最關注嘅都係大家冇受傷，健康平安最重要。

好多網友都戥佢肉赤，覺得好傷，問涉事司機點考個車牌返嚟（口架）？另外，亦有網友笑言隔籬車主係咪想認識胡健民，應該係想同佢交換電話號碼喎。