要聞港聞

政情:外判清潔工欠支援 陸頌雄鬧食署懶管

陸頌雄(箭嘴示)去屋邨體驗清潔工人嘅工作。 陸頌雄(箭嘴示)去屋邨體驗清潔工人嘅工作。
陸頌雄(箭嘴示)去屋邨體驗清潔工人嘅工作。
體驗倒垃圾 揭效率低危險重重
屋邨垃圾房成日都出現一啲大型家居垃圾,但大家又知唔知呢啲垃圾係點處理嘅呢?勞工界議員陸頌雄(Michael)日前就化身清潔工友搬垃圾,但竟然從中發現原來食物環境衞生署只係畀壓縮式垃圾車工友收集大型垃圾,效率低之餘仲可能會帶嚟危險,顯示政府支援外判工人處理大型垃圾有嚴重不足。
Michael前日去到天水圍天恒邨實地視察,體驗清潔工友嘅工作,但就畀佢發現部分屋邨(包括天恒邨)處理大型家居垃圾嘅次數太疏,而且係用平時嘅壓縮式垃圾車收集大型垃圾,但其實壓縮式垃圾車並唔適合。佢話首先會白費氣力,既花時間、又花人手,而且垃圾車壓碎傢俬嘅時候更會彈出碎片,容易出現意外,聽落真係好危險。
促設吊機處理大型垃圾
職業安全係由細節做起嘅,經過實地視察同埋體驗,令佢覺得政府外判工人嘅權益急需注視,而環境清潔工作更加係保證市民優質生活環境嘅重要大事,細節絕對唔可以忽略。所以佢建議食環署應該安排配備吊機嘅垃圾車處理呢啲大型垃圾,增加效率,又保障清潔工人嘅安全。
其實外判工人面對嘅難處都係一啲講到爛嘅問題喇,政府各部門例如房屋署都要負上責任。Michael今個月初就陪同外判工友代表會見房屋署代表,要求檢討外判制度,希望改善工友待遇,避免無良外判商剝削。
終極目標撤外判免剝削
Michael都話外判工友人工低、同工不同酬、工作負擔重已經唔係新聞,佢知道有屋邨因為人工太低請唔到人,有工友被迫假期都要返工,甚至有工友控訴工作時受傷,但因為工傷會影響外判商下一次投標,僱主竟然叫工友唔好報工傷。佢認為作為最終責任方,房屋署等有份外判工作嘅政府部門必須嚴格監管外判商,唔好外判工作之後仲外判埋責任先得㗎。佢又話其實佢嘅終極目標,係推動政府帶頭取消外判制,等基層勞工唔好再受到剝削啊!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500