政情：外判清潔工欠支援 陸頌雄鬧食署懶管

Michael前日去到天水圍天恒邨實地視察，體驗清潔工友嘅工作，但就畀佢發現部分屋邨（包括天恒邨）處理大型家居垃圾嘅次數太疏，而且係用平時嘅壓縮式垃圾車收集大型垃圾，但其實壓縮式垃圾車並唔適合。佢話首先會白費氣力，既花時間、又花人手，而且垃圾車壓碎傢俬嘅時候更會彈出碎片，容易出現意外，聽落真係好危險。

職業安全係由細節做起嘅，經過實地視察同埋體驗，令佢覺得政府外判工人嘅權益急需注視，而環境清潔工作更加係保證市民優質生活環境嘅重要大事，細節絕對唔可以忽略。所以佢建議食環署應該安排配備吊機嘅垃圾車處理呢啲大型垃圾，增加效率，又保障清潔工人嘅安全。

其實外判工人面對嘅難處都係一啲講到爛嘅問題喇，政府各部門例如房屋署都要負上責任。Michael今個月初就陪同外判工友代表會見房屋署代表，要求檢討外判制度，希望改善工友待遇，避免無良外判商剝削。

Michael都話外判工友人工低、同工不同酬、工作負擔重已經唔係新聞，佢知道有屋邨因為人工太低請唔到人，有工友被迫假期都要返工，甚至有工友控訴工作時受傷，但因為工傷會影響外判商下一次投標，僱主竟然叫工友唔好報工傷。佢認為作為最終責任方，房屋署等有份外判工作嘅政府部門必須嚴格監管外判商，唔好外判工作之後仲外判埋責任先得㗎。佢又話其實佢嘅終極目標，係推動政府帶頭取消外判制，等基層勞工唔好再受到剝削啊！