政情：立會擴建 議員嫌要等到2025年

工程喺明年中展開，喺2025年年中完工之前，45位議員及其職員、立法會秘書處職員要暫時使用中信大廈嘅辦公室。議員梁志祥嫌工程時間太長，要整整一屆立法會，至可以令90名議員「坐埋一齊」，情況不理想。

建築、測量、都市規劃及園境界議員謝偉銓就認為，前年立法會被闖入嘅暴徒「打爛好多嘢」，但加強保安之餘，亦要考慮外觀莊嚴度。謝提議採用更長遠的保安裝置，不用「下下搬水馬嚟」，減少對行人及道路嘅影響。立法會秘書處秘書長陳維安回應話，大樓外嘅水馬是由警方按整個添馬建築群嘅保安而設置，會向警方反映議員對大樓外觀嘅關注。

另外，謝偉銓話大樓內嘅升降機唔夠智能，議員要等好耐至可以進入升降機。陳維安就話長遠會物色高智能嘅升降機控制系統，同時大樓內將增設第8部升降機。陳亦指有議員提議擴充大樓內嘅健身室，亦應加強採光，秘書處會研究。