政情:劉業強大懵 黃錦星請食檸檬
求押後審擴堆填區 唔知冇分開表決
立法會財務委員會尋日審議新界西堆填區擴建計劃,將工程計劃嘅一部分提升為甲級,估計預算約442.778億港元。議員劉業強前日就去信環境局局長黃錦星,話希望押後審議。之不過,黃尋日就一口回絕,話需要盡快確保有足夠設施處理廢物喎。
話說工務小組委員會喺今年3月尾曾經討論擴建新界西堆填區嘅工程議案,並以13票贊成、兩票反對通過議案並提交財委會,當時並冇議員要求喺財委會上分開表決。換言之,議程將唔會進行討論,亦唔會有相關官員列席。
話陳茂波都冇表示同意
不過,劉業強前日就突然去信黃錦星,話部分議員喺工程造價、噪音、空氣污染等問題上表達憂慮,又質疑工程對政府構成財政壓力,希望黃慎重考慮同埋押後討論。之但係,如果真係想討論,又點解唔早啲向財委會提出分開表決嘅要求呢,莫非唔記得咗?
劉業強解釋,先前以為有人提出分開表決,去到前日先知原來冇喎,仲話封信有轉發畀財政司司長陳茂波,但司長都冇表示同意,所以冇辦法啦。佢話新界西堆填區擴建嘅諸多問題當中,當地嘅交通問題最令佢擔心,認為擴建後多咗垃圾車出入更容易造成交通擠塞,因此長遠而言政府都應該考慮使用焚化爐,同埋垃圾徵費嘅方式嚟處理垃圾,而唔係繼續擴展堆填區呀!
點都好啦,黃錦星尋日就回覆話堆填區即將飽和,唔可以延緩相關議程,政府會就堆填區工程同地區人士設立聯絡機制,務求將影響減到最低。佢又承諾稍後時間聯同發展局同劉業強會面,同埋再次感謝劉嘅意見。簡單而言,即係唔會押後、冇得傾喇!
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500