昔日東方政情：曾借出議辦搞初選劉珈汶已做「逃兵」
公民黨（公文袋）近期雖然冇咩動靜，但其前黨員嘅動向仍受外界關注。繼前議員郭榮鏗去年離港遠赴加拿大，該黨前副秘書長、前區議員劉珈汶（Carmen）原來已離港數周，並喺尋日透過社交平台貼文，話區議員宣誓將至，傳言不斷，而秋後算帳動作未明，氣氛每況愈下，自己成為「逃兵」感到內疚不已。雖然佢喺文中冇交代去向，但就上傳一張看似喺英國西敏寺內拍攝嘅獨照。
走得倉卒似赴英 嘆人離鄉賤
Carmen話冇資格話自己係流亡，但又談不上係走難或移民，形容自己係「失去了根的遊子」。佢透露自己離開得倉卒，幾個星期以嚟，到依家仲擔憂住屋同生計問題。佢又話「人離鄉賤，只有互相守望、互相扶持才能守住香港人的信念」，所以當前最重要嘅事，係能夠照顧到其他人之前，先好好照顧自己。
其實Carmen離開香港都唔係冇原因。去年民主派「35+」初選舉行時，佢就借出議員辦事處作為票站，後來又被指曾借出辦事處畀現已解散嘅「公民議政平台」籌委開會，區議會秘書處事後向佢發信，要求解釋，否則佢辦事處嘅整個月開支會不獲發還。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
