政情：鄭松泰提早交吉議辦 立會歎最後午餐

鄭提到辦公室內嘅物件已經執拾好，尋日下晝開始搬運，今日下晝3點將會做最後盤點，簽個名就搞掂晒。點解提早走？佢就解釋話，怕打風嘛，同埋星期六唔想助理特意返工。仲話本身仲想早啲，但點知拖拖吓拖到依家。至於議辦嘅物件就應該搬去自己喺葵涌大連排道租嘅工作室。

至於議員酬津計到去上月25日，但約滿酬金就無啦。按延任一年嘅總薪酬、即逾122萬港元計算，佢唔見咗約18萬元。鄭松泰坦言，未來要面對生計問題，自己工作室會推展有關教育、文化相關工作，亦會舉行網上課程及講座，以賺取基本收入，中長遠就希望喺福利或慈善工作上投放多啲精力，包括參與更生人士有關嘅工作。

由於臨別在即，鄭就同一班助理喺立法會食最後一餐，並點咗一道乾炒雞絲意粉嚟品嘗，佢話本來係想食胡椒豬肚雞（口架），認為呢一道菜最好食，但可惜餐廳尋日並無提供。被問到離開立法會會否感到唔捨得？佢話完全無，直言呢度只係做公務地方，無投放太多私人感情，亦無謂有感情，只係一個令人唔愉快嘅地方，不過硬係要講，佢就話最唔捨得圖書館，平日自己成日去借書，最後仲借咗本《從鄧小平到習近平》睇添。