要聞港聞

政情:人事工務小組 擬設人數下限

繼立法會內務委員會及財務委員會打算為委員人數設下限,財務委員會主席尋日擬修訂人事編制委員會及工務小組委員會委員嘅組成,諮詢全體議員意見,其中包括為兩個小組委員會設人數下限,即委員數目唔可以少於15名委員。
新一屆會期修訂生效
根據立法會文件,今次涉4項修訂建議,包括建議立法會主席以外嘅全體議員,可選擇加入兩個小組委員會,委員數目雖然不設上限但就唔可以少過15名委員,有關修訂將喺新一屆立法會會期生效。
喺財委會會議紀錄方面,過去除非得到財委會同意,否則唔會為該會議提供逐字紀錄本。新方案就建議由新一屆立法會會期開始,財委會會議要記錄出席議員姓名、須採取跟進行動、所作出嘅所有決定,並夾附會議逐字紀錄本。
另外,由於早前內會已同意喺下屆立法會,唔再規定全體議員需要加入財委會,而委員會委員人數將由不少於50人組成,所以有必要對《財務委員會會議程序》作出相應修訂。議員需要喺今個月15日或之前交回問卷,如獲得足夠支持,會由財委會喺日後一次會議上考慮,若獲財委會批准,則喺下屆立法會開始生效。
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500