政情：陳劍琴洗住廁所見街坊

一切要由冷氣機開始講起。話說荃灣前區議員陳劍琴要交還議辦，由於要將議辦還原，所以連部冷氣機都要拆走，佢喺社交平台上載咗張推車仔搬冷氣機嘅相之餘，仲爆料添！

佢話記得有次喺議辦清洗廁所，順便洗埋冷氣機隔塵網。點知洗洗吓，霎時間有幾個街坊去搵佢，有嚟求助嘅，有嚟搵佢傾偈嘅，亦有路過打氣嘅，雖則佢當時勁唔好意思，於是一邊繼續若無其事咁繼續洗廁所，一邊同街坊講唔好意思同傾住偈。

咁嘅場面都幾尷尬，查實點解唔停低先呢？班街坊冇投訴咩？點知結局都幾反高潮，竟然係傾傾吓，其中一位熟悉嘅街坊仲掉番轉頭，幫佢手一齊洗抹冷氣機殼。