政情：還押中添丁 張可森期待湊放學

張嘅太太喺社交網站分享初生兒子嘅相片，提到嚟緊要專心坐月同湊仔，冇得探張可森之餘，仲應該會少咗時間寫信畀佢啊。佢就呼籲其他朋友多啲寫信畀張可森，仲提議可以分享育兒心得添。

張可森已經被還押超過半年，佢喺今年3月以太太懷孕為由申請保釋，太太亦一度向佢展示一張胎兒超聲波照片。不過，張可森仍然被拒絕保釋申請，原本係填詞人嘅佢就喺獄中寫下一首歌，題為《缺席通知》，向懷孕嘅太太以及未出生嘅兒子道歉。而今年4月張亦曾向親友透露，如果重獲自由嗰陣，可以湊到個仔幼稚園放學，已經好心滿意足。