政情：落選魔咒 專剋泛民健身室 立會擴建續保留

擴建計劃中，喺1樓至8樓會增設會議室、培訓中心、多功能活動室及議員會客室等，至於9樓至14樓，每層會有15間議員辦事處同埋議員會客室。據了解，位於5樓嘅健身室就唔包括喺工程內，即係唔會受影響。

現有嘅健身室設施多多，當中有一個設施嘅「殺氣」特別重，就係跑步機啦。之前都有前議員發文向新丁教路，提到經常使用跑步機嘅議員紛紛落選，中咒率更加高達百分之百！

有政黨就畀傳聞嚇怕，時任公民黨（公文袋）黨魁楊岳橋甚至曾經「下令」同僚切勿踏入健身室，違者要以「黨紀處分」。即使一眾黨員聽話冇踩入健身室，似乎就踩咗另一條紅線，令到如今多名時任黨員，包括楊岳橋自己都因參與去年民主派「35+」初選，被控違反《港區國安法》被還押，繼而觸發退黨潮，黨內可謂潰不成軍。

以前間唔中都會用跑步機嘅范國威喺2016年立法會選舉落選後，仲曾經同傳媒講認為有關傳言毫無根據，直言自己百無禁忌，唔擔心被所謂「落選咒」影響，話日後成功重返議會都會繼續使用喎。佢雖然喺2018年補選重返議會，但其後被裁定並非妥為當選再次失去議席，如今亦同因「35+」初選案而被還押添。

不過現任仲有議員用健身室(口架)喎，就係旅遊界議員姚思榮，以及體育、演藝、文化及出版界議員馬逢國喇。佢哋兩人成日孖住去立法會健身室、互相照應，事關以前健身室燈光偏暗，而且少人問津，分分鐘出意外都無人知喎。既然怕出事，點解唔怕健身室魔咒呢？原來姚思榮曾指以過往中招者以直選議員居多，笑言功能界別議員唔使怕，從來冇擔心過會「撞邪」啊！