昔日東方政情：DQ鄭松泰 電訊法委會摺埋
前熱血公民主席鄭松泰被裁定選委會當然選委嘅登記無效，佢嘅立法會議員資格亦即時被取消（DQ），5年內都唔可以再參選。由於鄭失去議席，佢原本加入成為委員嘅《2021年電訊（修訂）條例草案》委員會就因為唔夠人數，加上冇建制派議員加入填補，而成立唔到。又話有議員幫拖嘅？
唔夠人數 陳克勤冇搵人幫拖
根據《內務守則》第21（b）條，每一個法案委員會須由唔少於3名委員組成。由於喺限期前只有陳克勤 （克勤）同議員葛珮帆表示會加入上述法案委員會，所以立法會秘書處尋日通知議員，有關法案委員會未能成立，至於已經安排喺今日舉行嘅首次會議亦要取消。
其實克勤喺鄭被DQ後，就曾經喺Facebook貼文打「告急牌」，當時仲話已經有一至兩位同事私訊佢，話有需要嘅話願意加入委員會喎。之但係依家人影都唔見喎，究竟係咪有人甩底呢？
克勤就話，由於今次條例草案主要係作技術性修訂，相對簡單，加上局方已就條文向佢哋作解說，相信即使成立法案委員會，亦只需要一個會議就可完成審議，認為議員應該花時間處理其他條例草案，所以最後都冇再向其他議員「求救」。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
