政情：獲活化重生 諗起荃景圍 訪中環街市 田北辰觸景傷情

田話今次去到中環街市最驚喜嘅就係，買到佢細個時最鍾意食嘅飛機欖。佢話細個住喺3樓，最期待就係睇住啲飛機欖喺下面「飛」上嚟。所以見到有得賣，都即刻買咗飛機欖、糖葱餅、水泡餅等，過吓口癮咁話喎。佢仲話好開心見到中環街市最後得以活化保存，而唔係拎嚟起樓。佢又建議中環街市可以引入更多保留香港傳統文化、地道美食嘅舖頭，而唔係淨係賣啲其他地方都買得到嘅嘢囉。

可能因為喺街市嘅關係，田又諗起荃景圍街市由2018年已經關閉，至今都3年喇，反問唔通荃景圍街市又要曬太陽曬番18年先重新開放咩？佢話有喺今年嘅施政報告入面促政府盡快為現有產業活化設時限，因為有指標先有動力（口架）嘛！佢又透露以佢所知政府內部都就此商討中嘅，所以希望盡快有活化方案拋出嚟啦！