政情：過來人潘佩璆 勸移民前要諗清楚

潘佩璆日前透過社交網站，問到底呢一年多以來，香港係變好還是變差？如果認為香港變差，咁又會否希望再次回到2019年下半年嘅日子？新冠病毒肆虐全球，香港嘅抗疫成績較諸有意前往嘅國家，係較好還是較差呢？至於移民目的地嘅當地人會唔會歧視亞洲人？有冇想過子女喺學校遭到欺凌？而自己又可以點樣保護佢哋呢？

跟住潘就提到最「入肉」嘅問題，指移民意味着放棄自己所建立嘅事業、收入、朋友、生活方式、同埋子女就讀嘅學校，即使移民後盡力拚搏，亦可能無法得回離開香港時所失去嘅一切，而呢啲犧牲可能係永久o架。潘又話九七前嘅移民，多數都可以順利回流。然而香港社會已嚴重撕裂，今日嘅移民者，人未走已飽受冷言冷語。如果他朝要回流香港，能否接受未來港人嘅歧視同排擠嗎？潘話如果回答以上問題仍決心移民，只好祝你得償所願。