政情：羅致光談貧富差 冇稿照讀口啞啞

話說提出議案嘅麥美娟，以及提出修正案嘅田北辰發言完畢之後，就輪到羅致光發言嘞。羅喺發言前講明，指呢個議案牽涉範圍甚廣，佢只能夠代表政府其中一個問責官員發言，隨即開始發表佢嘅見解，但當講完政府為特殊教育學生提供嘅支援後，羅嘅表情就開始變得困擾，之後更加搵唔到要講嘅內容，皺晒眉頭話「唔好意思我要睇睇」。

羅致光開始不斷咁揭文件，一路揭一路口噏噏咁話「簡單嚟講，過往嚟講……我哋一直……努力係喺……我哋工作各方面……點樣去協助……達到我哋有關……」但最終都係搵唔到要講嘅嘢，惟有好尷尬咁話「唔好意思自己喺處理稿件時出現小小錯誤，總之簡單講政府會繼續努力處理有關議題，稍後會再回應大家問題，聽取大家意見。」跟住就結束發言嘞。

其實香港嘅住屋以及貧富懸殊，都唔係今時今日嘅問題，講咗咁多年照計背都背得出啦，到底羅致光係事先冇做好準備，還是借故避過討論呢？咁就不得而知啦！之不過，在席嘅議員依然就議案各自發表見解。議員梁美芬慨嘆房屋問題幾十年都無改變，又指籠屋居住環境惡劣，促請政府大量增加公營房屋供應，包括重建舊屋邨。

議員容海恩就認為香港扶貧政策欠缺方向，導致財富不均及難以釐定需要幫助嘅群組，故數字收集方面要改進。議員周浩鼎就認為本港產業結構單一亦係一個問題，指當局應該喺應用研究及科研等做多啲工作，甚至發展高增值航運業，做到產業轉型。

運輸及房屋局副局長蘇偉文就回應話，政府已經覓得土地，滿足未來3年嘅房屋需求，又會將居屋計劃恒常化，強調政府有決心解決住屋問題，承諾會加快公屋供應。