政情：葉劉女兒大頭蝦 冇登記消費券

原來葉劉個女唔記得登記，所以冇得享用消費券。之但係，坊間都有人提過，希望政府畀冇登記嘅市民補飛，唔知政府點諗呢？

咁葉劉又因乜咁遲先至用消費券呢？佢解釋，係因為公務繁忙喎，而佢喺上個周末就去咗「巡舖」嘞，仲有店員向佢「投訴」添！話政府喺發放第一輪消費券後，幾間大型超市嘅貨品已靜雞雞改咗銀碼，而佢嘅司機亦話坊間唔少茶餐廳都加咗價嘞！

巡完舖後，葉劉嘅結論係政府派5,000蚊消費券帶動本地消費嘅效應，遠遠大於經銀行派發一萬蚊現金，而唔少市民收到消費券之後，好快就使晒，所以佢認為分期發放消費券做法正確，否則總額300幾億嘅金額就好似燒煙花咁轉眼冇晒，只能產生極短暫嘅消費效應。