政情：DQ鄭松泰 法案委會險摺埋

克勤尋日喺Facebook貼文，話鄭松泰被DQ雖然係咎由自取嘅，不過掃走咗佢，都可能影響一條法例的審議工作。因為根據《議事規則》第76（3）條，每個法案委員會最少須由3名議員組成。但最近立法會成立嘅《2021年電訊（修訂）條例草案》委員會，成員就只得陳克勤、鄭松泰同埋葛珮帆（EQ），所以鄭松泰被DQ後，委員會就會唔夠人，除非9月4日前多一個議員加入，否則法案委員會就成立唔到喇，相關法例亦會自動提上大會，恢復二讀和表決。

《2021年電訊（修訂）條例草案》係關於乜嘢？草案係包括修訂《電訊條例》第106章，以促進5G服務嘅發展及確保規管架構能緊隨科技發展與時並進。草案會訂明通訊事務管理局嘅權責，集中規管可連接網絡嘅智能產品功能，包括電訊技術標準和規格。另外亦訂明，喺電訊線路附近進行地下工程而沒有採取合理步驟和措施保護或防止地下電訊線路受損，將構成刑事罪行。

好彩嘅係，克勤話當佢呢篇打告急牌嘅貼文出咗無幾耐，已經有一至兩位同事私訊佢，話有需要嘅話願意加入委員會，即係問題應該可以解決喇！

其實鄭松泰被DQ，自己都一身蟻o架！佢將會失去兩個月嘅酬津，約滿酬金都有影響，但一切都有待商榷。而日前佢話喺元朗嘅議員辦事處將會喺10月結業，就已經畀網民留言嘲諷，有網民重提佢倒插五星旗事件，仲話佢曾經為衝擊立法會嘅人士「帶路」，都要搵佢「找數」，叫佢唔好走添；亦有人話要送兩打「藍店」西餅畀佢，同佢慶祝喎。