昔日東方政情：官員一問三不知 田二少嬲爆
如何提升港人嘅運動風氣，係近日城中嘅熱門話題。議員田北辰（田二少）都話關注到巿民，尤其係學生嘅運動量，一直遠低於世衞標準呀！雖然香港都有一個鼓勵學童做運動嘅計劃，但田二少向相關官員問到計劃嘅詳情，對方唔係搬出疫情，就係以學校停課為藉口，閃爍其詞無法提供相關資訊，令田二少為之氣結。
叫交出鼓勵步行計劃數據
田二少話新加坡6年前啟動一個全國健步大挑戰嘅計劃，向巿民派發運動手帶以記錄步數同消耗嘅熱量，再以獎品提供誘因，結果首年就有10萬人參加，3年後人數更激增至70萬，其中七成人每日行7,000步，三成更超過萬步，效果甚佳。反觀香港，田二少話睇見政府文件得知有類似計劃，又係派手帶畀學童以鼓勵課餘時間做運動。但當佢要求官員提供計劃數據，對方就藉詞學校停課、疫情期間唔鼓勵巿民外出……總之理由一大籮，但始終都講唔出有關計劃嘅數據。
田二少話個計劃係4年前開始，疫情前嘅數據點都有啩？又指文件既然有寫，官員就應該做足功課，否則乜都唔知，點到立法會開會呢？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
