政情：40人犯聚攞嚟衰 朱江瑋酬津凍過水

消息話，放映會喺晚上7點半開始，出席嘅觀眾及義工約40人。晚上接近10點嘅時候，突然有10幾個食環署職員同警員到場，話辦事處係「公眾場所」，而放映會屬於公眾活動。警員之後要求在場人士出示身份證，向多人發出違反禁聚令嘅599G告票。據了解，有執法部門收到上址舉行有關活動嘅舉報，早已派人混入場所「放蛇」，確認活動容許有「不相識的人士」參加，認定場地係公眾地方，所以可發出599G告票。

朱江瑋事後解畫，指現場人士全經朋友輾轉介紹，唔屬於公開活動，純粹係一個私人地方舉行嘅朋友聚會。朱嘅助理尤先生就話，活動屬私人性質，係朋友帶朋友參加，根本唔可以話「有一個人唔識，就係公眾地方」，認為執法人員嘅講法唔合理，而有參加者更表明唔會繳交罰款。

民政事務總署方面就認為，朱使用其辦事處進行與區議會無關嘅工作、或許觸犯香港法例嘅活動，可能違反《公眾娛樂場所條例》同埋《預防及控制疾病（規定及指示）（業務及場所）規例》（第599F章）。該署提醒朱應遵守相關指引，如事實證明佢嘅區議員辦事處曾用作不合乎區議會職能嘅用途，相關嘅酬津同埋辦事處營運費用將不獲發還，更可能或因違反其他法例而負上刑責呀。

其實新冠肺炎疫情仲未結束，放映會可以用網上形式進行，大家安坐家中一樣可以睇電影同埋與導演進行交流，點解一定要以身試法呢？