政情：凌嘉勤設計傢俬 供劏房童做功課

凌嘉勤早前出席一個訪談節目中提到，大概喺2016年，超過70年樓齡嘅樓宇住宅單位有千幾個，但30年後會增加300倍，高達30幾萬個！儘管呢個驚人數字係將來嘅事，但凌就留意到，今日嘅老化樓宇裏面偏偏就有好多劏房，於是佢最近就進行一個項目，為住喺劏房嘅小朋友設計做功課嘅傢俬。

點解諗到為住劏房嘅小朋友造傢俬？佢話理大曾經做過研究，發現小朋友嘅脊椎發育有問題，視力發展都會有問題。佢話依家造咗幾套傢俬，啱啱開始畀佢哋試用，到底效果如何，就要觀察一段日子先至知。