政情：公務員學院「階梯」標誌 率先登場

究竟「階梯」有乜嘢意思？代表官運亨通、步步高陞？原來係寓意公務員持續學習、不斷向上同追求進步，致力成為一支學習型同專業嘅隊伍，為市民提供精益求精嘅公共服務。至於標誌嘅構思，就係利用公務員學院 （Civil Service College） 嘅英文簡稱「CSC」為主體，塑造出俯瞰階梯嘅形態，反映每一位公務員既係獨立嘅個體，同時間亦係整個公務員團隊嘅一分子，一齊為市民提供公共服務。

今次比賽收到超過600份參賽作品，參加者來自超過60個政策局或部門，包括現職公務員同事、非公務員合約員工同退休公務員。所有作品經過兩輪評選，由黃紹滔奪得金獎，銀獎係庫務署嘅高兆強，而銅獎係入境事務處嘅黃偉鵬。頒獎禮尋日喺政府總部舉行。