政情：Hea答保障外賣員羅致光辣㷫麥美娟

「做緊嘢」敷衍盡顯涼薄一面

網上外賣平台如雨後春筍，形成一種新經濟以及新嘅勞動關係，然而多名議員都批評勞工及福利局未有因應新時勢，導致相關嘅外賣平台喺僱傭方面冇調查、冇規管、冇政策嘅三無情況。有議員促請政府設立發牌制度規管平台公司，要求公司為員工購買意外保險等。勞福局局長羅致光就回應話「有做緊嘢」，指勞工處以及政府統計處正商討進行主題性住戶統計調查計劃，掌握平台工作者情況喎。言論一出，即時辣㷫議員麥美娟，話佢一啲都唔重視呢個問題。

對於議員要求政府盡快檢視僱傭模式，羅致光話平台工作者係咪平台公司僱員，視乎個別工作合約以及內容，但強調該人士係咪屬於「僱員」，並非單純取決於職位或者合約名稱。即使根據雙方所訂嘅合約，某人就算被稱為自僱人士，若實質上存在僱傭關係，有關公司仍要履行勞工法例所列嘅責任。佢又強調藉假自僱合約以逃避向僱員提供僱傭權益嘅僱主，須承擔法律後果。

「假自僱」依平台指示謀生

勞工界議員陸頌雄動議「保障平台工作者的權益」嘅議員議案，但喺分組點票下被否決。佢話外賣平台公司有全面控制權，雖則聲稱僱員可以自由彈性咁接單，但若果「踢單」太多，會遭到被罰錢、扣單嘅後果，以致外賣員都好緊張，連去廁所都要望實手機，陸認為依外賣平台嘅指示謀生，實屬假自僱關係。

議員郭偉强同埋潘兆平所提出嘅修正案亦同被否決，郭話外賣平台往往標榜工作極富自由度，想做就做、唔想做就唔做，更加可以拒絕接單，令到僱員最初都信以為真。郭亦不滿平台以僱員可以自由上班係「打風流工」為由，界定佢哋為自僱人士，而拒絕提供基本保障同埋權益。

麥：係咪有意外先肯做嘢？

至於麥美娟就指局方態度係「Hea答」，反問局方係咪要等到出現官司或者意外先至肯做嘢。佢又提及有內地官員親身體驗外賣工作，直指「局長望都唔望我哋，都唔係叫佢做外賣工喇」，又指政府連統計、研究都欠奉，佢話若果重視巿民，巿民都會公正咁對待番佢啊。

不過，飲食界議員張宇人就反對議案，佢話唔好以為畀多啲保障就係對僱員好，但其實係糖衣毒藥。若然設立發牌制度，限制外賣員只可以受聘於一間公司，會令佢哋嘅收入減少，對於公司而言，亦會增加營運成本，如果老闆計唔掂數，隨時連員工搵錢嘅機會都冇埋。