政情：無招應對鄰里糾紛徐英偉一味叫體諒

雖則話遠親不如近鄰，然而香港地人煙稠密易生摩擦，鄰里關係往往形同水火。議員柯創盛（柯仔）指左鄰右里容易因噪音、衞生及冷氣機滴水等問題出現糾紛，於是喺尋日立法會口頭質詢環節上，關注政府到底有何措施協助市民解決糾紛，包括效法新加坡就鄰里糾紛設立社區調解中心同仲裁庭。不過民政事務局局長徐英偉嘅回應就好似數白欖咁，交代現行有咩政策處理上述問題，搞到柯仔都好勞氣咁話，如果現行措施有效，就唔使浪費口頭質詢時間提問啦！

議員建議擴展調解中心服務

柯仔仲話規管噪音及光污染嘅條例實施多年，關注部門會否有時間表或方向作檢討，以改善鄰里關係。另外議員容海恩就建議，政府擴展西九龍調解中心服務，涵蓋社區調解問題。

徐英偉回應話，滴水及滲水問題較技術性，只要知道問題所在及釐清責任，好多爭拗都得以解決，至於噪音問題就真係需要互相體諒。佢又提到部門會因應個別政策及相關因素考慮調解方案，並向大廈物業管理處提供指引；如果要進入調解程序，需要市民有共識、一人願意行一步先得喎。