政情：陳婉嫻籲社區會堂大翻新 吸引市民

有慈善團體聯同工會尋日舉辦「暑期親子Art Jamming及兒童電子產品沉迷對策工作坊」，希望透過藝術繪畫活動，讓家長與小朋友親子互動，現場亦有小童劍擊表演。

參與活動嘅家長蔡太話因為疫情關係，學校進行網上教學，長期嚟講對小朋友嘅眼睛同身體構成影響，好彩佢囡囡只將電子產品用作學習用途，並冇沉迷落去。另一位家長張太就話囝囝放學同補習後亦會機不離手，勸告無效後佢亦只能無奈沒收手機。佢哋都認為親子活動有助紓緩「網癮」。

嫻姐認為活動有助家長同仔女溝通，建立良好家庭。佢建議政府應舉辦唔同活動，同時翻新社區會堂嘅殘舊設施。佢舉例話依家身處嘅社區會堂冇歌唱設備，若果需要舉辦同音樂有關嘅活動就要另覓場地，所以佢認為應設有多元化嘅設備，咁先可以令更多市民參與活動。