政情：引海外醫生 修例綁手綁腳 政府自閹

工程界議員盧偉國質疑修例對解決醫生荒嘅效用，政府又預計能吸納幾多海外醫生回港。食物及衞生局副局長徐德義回應話，政府無正式統計有幾多港人海外學醫，只透過同海外留學生傾談，初步估算可能有數百名香港居民海外讀醫。徐又指若條例通過，當局將組成特別註冊委員會，希望一年內訂立海外合資格醫學院嘅名單，其後就可以開始招聘喇。

盧話政府無理由無機制統計海外學醫港人數字，批評當局唔可以只求通過條例。委員會主席葛珮帆都話，對於政府一直未能提供將引入多少醫生而感到失望。加上當局稱法例通過後委員會方訂出醫學院名單，繼而進行招聘，認為耗時至少兩年，質疑做唔到急市民所急，更斥若政府唔改善，等於浪費議員嘅時間同心血。

本身係醫生嘅陳沛然就認為，海外醫生最終都會離開公營醫院到私營醫院服務，無助解決現時嘅情況。陳又指要求海外醫生參加本地執業試係最公平嘅做法，認為無執業試政府會好難評估唔同醫學院嘅水平。

徐回應話政府從來都唔會勉強醫生留喺公營醫療系統，又話除咗解決人手問題，政府亦會改善公私營合作。考試制度方面，徐指考核執業試雖然係長久做法，但唔少國家亦有免試例子，認為5年嘅在職評估更能長時間評核醫生表現。

海外醫學院名單方面，議員蔣麗芸指名單淨係得100間學院太少，應該要多過100間先得，又批評當局嘅修例綁手綁腳，自我設限，形容猶如自閹。議員邵家輝就回應陳沛然指公立醫院引入海外醫生惹起爭議嘅睇法，認為即使海外醫生最終轉到私營執業，但總會喺公營醫院工作一定年期，都幫到手嘅。邵又指全世界都想盡辦法吸引人才，但唯獨香港就想盡辦法阻撓人才到港。徐德義就回應話會考慮議員意見喎。