昔日東方政情：張崑陽潛逃一年 匿美申政治庇護
被通緝嘅前「民間外交網絡」發言人張崑陽，喺舊年8月潛逃海外後，一直冇公開身處地方，佢日前喺Facebook話流亡一年後決定喺美國居住，並已申請政治庇護。保安局回應查詢時強調任何人違反香港法律，港府會追究其法律責任，對於嗰啲死心不息危害國家安全嘅犯罪分子，政府定必依法追究到底。
去年6‧4涉非法集結
張崑陽喺貼文中話由於喺舊年6‧4非法集結案被法庭發出拘捕令，而佢參與民主派35+初選同國際游說，有兩條潛在觸犯《港區國安法》嘅罪名，所以已向美國政府展開申請政治庇護嘅程序。佢又話當初只係帶咗幾萬蚊流亡，情緒亦曾經極為低落，所以感激曾幫助佢嘅人。
對於喺美國嘅生活，佢會重返校園，事關佢得到美國約翰斯霍普金斯大學保羅‧尼采高等國際研究學院（Johns Hopkins SAIS）嘅院士同獎學金支持，得到佢哋碩士班取錄。
佢被控舊年6月4日喺維園參與未經批准集結，同年8月17日傳出秘密潛逃英國。由於佢喺9月15日缺席有關聆訊，同日貼文首度證實早於8月已離港，話因為國安法實施而令佢感到安全受到威脅而流亡海外。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
