政情：苦等5年團體未受惠兩億資助龜速審批

政府喺2016年推出涉款兩億元嘅「專業服務協進支援計劃」，以資助合資格專業團體舉辦活動，以加強行業同其他市場嘅交流合作等。有議員尋日就話，計劃推出5年，所批出嘅資助額只得5,400萬元，認為政府宣傳不足、計劃難落地，另有議員不滿為何金融服務界未有被納入計劃受資助名單當中，促請政府要將金融業界納入名單裏面。

立法會工商事務委員會尋日召開會議，議員盧偉國指計劃推出至今5年，但計劃下獲得資助嘅項目只有75個，所涉金額只佔計劃總額四分之一，關注政府點樣向業界推廣計劃，令更多專業團體受惠。商務及經濟發展局副秘書長陳瑞緯就話，局方本來係想「使多啲」，惟疫情導致撥款申請減慢，有團體即使申請舉行活動亦需要再作調整，政府已盡量接觸業界鼓勵其參與計劃。

20個項目商討中啟動無期

另外，去年《施政報告》宣布政府喺支援計劃下預留5,000萬元，設「專業人士參與活動津貼計劃」，津貼香港主要專業團體參與由政府、香港貿易發展局舉辦及香港駐海外經濟貿易辦事處舉辦嘅活動，現時已有5項暫定活動獲批。局方話，新計劃係支援計劃嘅簡易版，希望簡化團體申請舉辦活動嘅程序，現時仍有大約20個項目商討中，但因疫情關係，未知何時啟動。

金融服務界議員張華峰就認為，喺大灣區發展中，金融服務行業係重中之重，關注政府點解未有將業界納入合資格專業服務行業名單。商務及經濟發展局副局長陳百里解釋話，根據世界貿易組織及貿發局嘅行業分類制訂名單，雖然金融服務及風險管理業界未能納入計劃名單，但行業中部分專業人士為律師及會計師，同樣係計劃嘅受惠對象，如果金融服務界建議嘅活動令佢哋受惠，有關申請亦可以獲局方批准。