政情：立會花11.7億擴建議員進駐鄰廈坐住先

早前都講過，立法會大樓會推行擴建工程，以容納更多議員。呢項工程料需耗用11.7億元，至2025年中前先會完工。由於工程最快喺明年中展開，據了解到時大樓9樓同10樓要空出擺放工程雜物，辦公室一直喺10樓嘅政黨同新任議員就暫時需要到一橋之隔嘅中信大廈設固定辦公室。不過，原來喺政府決定租用中信大廈3個樓層前，立法會行政管理委員會曾經討論借用該商廈後嘅兩層構建物、即工地辦公室安置議員。

立法會大樓擴建工程包括喺現址增建4層，同埋喺一樓外嘅區域加建10層，唔多唔少都會影響議會運作，工程當然愈快完成愈好啦！身兼立法會主席嘅行政管理委員會主席梁君彥尋日喺會後表示，將於今個月25日向工務小組委員會提出撥款申請，如獲同意就會喺下月10日向財務委員會申請撥款。不過，工程最快要4年幾後先完成，有立法會秘書處、45位議員同埋佢哋嘅職員需要喺新嘅臨時辦公室工作。

一度打算暫用工地辦公室

至於租金方面就由政府同業主商討，立法會只需向政府繳付一蚊象徵式租金。不過，行政署回覆查詢時就話今次係由財政司司長法團以市值租金，承租中信大廈內3個樓層，總面積約4,500平方米，租約為期3年，由尋日起生效並提供續租權。

據悉，政府尋日先喺會上透露中信大廈恰好有會計師樓遷出，所以可租用大廈12、13同15樓（該大廈無14字樓），屆時會再增設鳴響傳召鐘、無線熱點及閉路電視等裝置。

之不過，原來行管會曾經討論借用位於中信大廈後近演藝道、屬路政署嘅兩層構建物做辦公室，但署方就話該處仲需用作辦公用途，最終放棄呢個安置議員嘅選項。話晒中信大廈都係甲級寫字樓，設施配套都會好啲，議員如果要同業界人士開會嘅話，都絕對唔會失禮嘛！

另外，擴建工程除增加會議場地，議員及秘書處辦公設施外，亦會加大立法會餐廳同大樓內活動室。據悉，有意見認為立法會大樓一樓宴會廳使用率較低，過去因列明用途，如只容許立法會主席同議員宴請官員或嘉賓，不作對外開放，有人認為唔符合成本效益，會上曾商討係咪應開放空間作日常營運，但暫未有定案。