政情：照顧運動員 胡曉明：團長責任重大

尋日胡曉明以嘉賓身份出席運動博覽嘅分享環節，期間佢講到3年前印尼亞運會，主辦方為確保飲食安全，烹飪菜餚往往過熟，韌如鞋底嘅牛扒真係難以下嚥。若果運動員投訴話食唔慣，佢就要向大會反映意見，要求煮多啲米飯，又或者提供即食麵。由於前赴當地嘅目的係參賽，所以佢唔主張運動員四處觀光遊覽，以確保人身安全，如果真係要外出，都要先完成賽事。

但講到最具挑戰嘅情況，就當然係處理突發事件啦。佢話有沙灘排球運動員隱瞞其白血病病況，結果賽事期間病發需盡快回港診治，為求對方搭飛機有足夠空間躺臥，於是要買三張機票。另外，有滑翔傘運動員落地時震傷脊骨，雖然唔使躺臥，但仍要買多一張機票供陪同返港嘅醫生。