政情：政府又甩底區議員仲未宣誓徐英偉：要做得仔細

政府早喺今年2月提出《2021年公職（參選及任職）（雜項修訂）條例草案》，列明會要求區議員宣誓效忠特區同擁護《基本法》。近月亦不斷傳出宣誓時間表，不過一拖再拖都無公布明確日期，仲要喺上月初傳出違誓行為清單以及「最辣」追薪方案，觸發區議員辭職潮。而主事嘅民政事務局局長徐英偉，就話由於自己處事較仔細，暫時仍未有宣誓時間表，又話唔清楚區議員辭職嘅原因喎。外界認同要求區議員宣誓嘅重要性，不過拖拖拉拉、不斷放風玩人就唔係咁好囉。

唔清楚泛民辭職原因

徐英偉尋日喺電台節目上表示，由於需要穩妥、徹底處理區議員宣誓安排，話希望容許佢做得仔細啲，暫時仍然未有時間表，不過承諾會盡快處理。對於早前有大批泛民主派區議員辭職，佢話唔清楚箇中原因，但又指部分人並非擔心被褫奪資格，叫大家問番相關人士。

至於二百多位區議員辭職所留下嘅議席空缺，徐英偉話暫時無意舉行區議會補選，到底未來仲需唔需要區議會呢？佢就話地區組織非常重要，例如非政府機構、防火委員會同埋撲滅罪行委員會都扮演重要角色，有助政府了解民情。佢仲話聽聞有區議員在任時服務唔多，遇到唔識處理嘅個案會轉介畀前任嘅區議員，認為係時候研究同檢討將來嘅地區行政發展。徐英偉嘅言論似乎係暗嘲油尖旺前區議員陳梓維曾經轉介地區個案畀上手嘅建制派區議員喎。

李傲然暗諷陳梓維

仲有連陳梓維嘅前同事、油尖旺前區議員李傲然都似乎一齊抽水，李喺陳宣布眾籌嘅同日提到，唔知點解突然有好多人關心佢嘅財政狀況，佢暫時要向政府歸還大約14萬元款項，另加大約兩萬嘅雜項開支費用，總計需承擔約16萬元。李傲然話感謝大家關心，不過自問有手有腳、智力正常，會繼續搵工同埋做好財務管理，相信暫時唔使籌錢。有網民似乎留意到「重點」，留言話「強調智力正常，笑咗」。李傲然就回覆話「咁我係智力正常o架嘛」。睇嚟大家都不自覺地聯想到佢係暗諷緊陳梓維喇。