政情：反對建院舍 涉歧視長者 社工麥潤培遭紀律聆訊

投訴人係理工大學應用社會科學系前首席講師李賀游，喺聆訊中李坦言不滿麥潤培反對興建安老院嘅主張，話現時申請入住院舍嘅長者甚眾，輪候期間不時衍生家庭問題，譬如長者遭到親屬虐待，嚴重嘅更加會出現血光之災。李質問麥「飲茶重要定照顧長者重要」，批評麥唔係以服務對象為重，罔顧長者需要令人失望，又質疑麥只係顧及個人利益，意圖藉事件撈取選票。當李問及麥點樣就事件諮詢居民時，竟然一度對住麥舉中指。

李又指出麥潤培曾經喺區內掛上強烈反對利安酒樓變成安老院舍嘅橫額，而橫額上亦有列出前議員張超雄以及楊岳橋同樣反對計劃。但李向兩名前議員查證之後，對方回覆話麥潤培從來冇同佢哋商討過事件，亦無同意喺橫額上加名，李認為麥涉嫌作出虛假陳述。

面對投訴人嘅指控，麥潤培話由於兩名前議員向佢借出抽籤名額，因此行政上需於橫額角落加上兩人嘅名，咁做並唔代表兩人支持佢嘅主張。麥一再強調自己當時並非履行社工職務，而係以區議員身份諮詢居民意見，表示已經向全體利安邨居民發問卷，平衡街坊意見同埋考慮整體利益後，先至反對喺有關位置興建老人院。麥又同佢嘅代表律師直斥有人借故上綱上線、大做文章，話平日都有好多長者幫襯酒樓，如果酒樓執笠會令長者連食飯嘅地方都冇。

聆訊期間，投訴人嘅親友屢次喺公眾席上高聲非議麥潤培。有關人士又大聲嘆氣，被委員會警告後就辯稱自己只是忍唔住咳兩聲，及後仲被委員發現佢使用手機向李賀游發出短訊，違反聆訊期間不得使用手機嘅規定。由於委員會需要處理投訴人臨時呈交嘅證據，以致聆訊歷時約7個鐘仍未完成討論。到底投訴是否成立，就要待下回分解啦。