昔日東方政情：白鴿內鬥陸續有嚟
林卓廷盲撐李永達 轟黨內有人謀上位
因違法佔領中環行動案被判囚8個月、緩刑兩年嘅民主黨副主席李永達，日前被揭喺無向黨高層交代嘅情況下離港赴英。民主黨有中委喺社交平台貼文指「叫人衝、自己鬆」，雖未指名道姓，但已掀起爭議，並惹來去年因參與泛民主派「35+」初選涉違《港區國安法》被還押、該黨前議員尹兆堅（肥尹）痛斥嗰名黨友係「契弟」後，事件繼續發酵，同樣因「35+」初選被還押嘅林卓廷尋日亦接力炮轟，指黨內有人謀上位！
尋日林卓廷透過助理喺Fb發貼文，林稱自己認識李永達20年，相信李嘅為人，認為李嘅離開一定有其苦衷，又拎涉違《港區國安法》被香港警方通緝、現正流亡澳洲嘅前黨友兼前議員許智峯做例子，話許出走嗰陣林自己都曾經講過，「去留肝膽兩崑崙」。
林續指，立法會選舉報名嘅日子將至，佢相信民主黨入面會有「絕少數嘅人」，選擇擁抱新嘅選舉制度謀求上位，直斥要等呢啲人向香港歷史及香港人自己交代喇！
還押尹兆堅 唔開名鬧契弟
尹兆堅前日喺貼文中，唔開名鬧爆貼文「叫人衝、自己鬆」嘅黨友係契弟，指有人一直以嚟都係機會主義者，立場前後反覆，把口時激時縮，講到尾都係睇形勢，肥尹話「忍你好耐，請你唔好再扮堅持、扮硬淨！話自己頂到尾，食晒定心丸出嚟話唔辭職，好難睇！呢半年無為個黨分憂，仲結黨結派鑿沉船、拖後腳。依家仲要出嚟抽水？呢群一丘之貉，唔好逼我開名揭你底牌！」佢仲話唔開名同爆粗已好克制。
雖肥尹話唔會開名，但因發貼文「叫人衝、自己鬆」嘅係該黨中委兼東區區議員蘇逸恒，難免令人猜測肥尹嘅指摘對象就係蘇。
網民食花生 叫鄺俊宇回應
另肥尹又提到黨有幾位副主席，雖同樣無點名講係邊位副主席，但就有網民喺留言貼出該黨副主席梁翊婷嘅Ig限時動態截圖，上面寫有「不負責任、不知所謂」，該限時動態於李離港後上載，又有人點名涉去年民主派「35+」初選被捕但未被起訴、正保釋在外嘅元朗區議員鄺俊宇，叫佢回應。肥尹另指有人為選舉做花瓶，而咁啱林卓廷都批評有黨友希望透過選舉上位，暗示黨內有人想出選嚟緊嘅立法會選舉。莫非今次事件會觸發民主黨內部主戰派同反戰派嘅鬥爭？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
