政情：草案唔完善 校長界促禁電子煙 象哥：要循序漸進

草案建議禁止包括電子煙、加熱煙在內嘅新興另類吸煙產品及相關零件或配件進口，又建議禁止為製造、售賣或分發目的而管有另類吸煙產品。草案委員會喺6月下旬開完會後，話會喺今個月內會再開會討論，作一個了結，但睇番立法會日程表仍然未見開會日期。

唔知係咪見臨近今屆會期結束，草案委員會仍喺膠着狀態，所以多個團體都出嚟發聲。包括香港津貼中學議會、津貼小學議會同香港中學校長會等10個中小學校長會，尋日召開記者會促請政府同立法會盡快通過相關條例草案，阻截新興煙滲入校園、危害學童健康。

香港直接資助學校議會主席陳狄安校長話認識一名吸食電子煙兩年、約15歲嘅青少年，該青少年唔清楚電子煙嘅副作用。佢認為電子煙嘅多種味道同埋包裝令青少年輕視吸煙的禍害。對於坊間有意見指，政府應「禁止電子煙、規管加熱煙」或「以規管代替禁止所有新形式的吸煙產品」，各協會就認為或會造成法例漏洞，令針對青少年宣傳嘅問題更為嚴重。

象哥表明一直密切聯繫食物及衞生局，提出各方面嘅意見，目前仍處於磋商階段。對於校長會反對以規管嘅方式取代立法禁止加熱煙，佢話理解校長會嘅立場，認為佢哋都冇錯嘅，但就冇考慮到現實狀況囉。佢強調自己作為議員，必須尋求雙方都妥協嘅方法，期望盡快處理好修例喎。

佢又話若果全面禁止加熱煙，會令加熱煙更神秘，對青少年誘惑更大，形容立法唔可以矯枉過正，要合乎邏輯先得。佢又質疑當局草擬修例並唔完善，例如只禁止進口、售賣或製造電子煙，但就無提出禁止藏有或吸食，擔心會令黑市私煙市場進一步擴大。佢仲話如果只企喺「道德高地」，就無討論空間，強調立法過程中，要顧及現存煙草業界從業員嘅生計，循序漸進取締對健康有不良影響嘅產品。