政情：羅致光愈扶愈貧玩數字遊戲愚人勞界炮轟

香港貧富懸殊嚴重，外界不斷批評當局愈扶愈貧。勞工及福利局局長羅致光尋日都承認香港有貧富懸殊已經係不爭嘅事實，但就覺得改用除稅同福利轉移後嘅收入，嚟計算堅尼系數比較公平，又話香港今年堅尼系數排名因而上升12位，排名第48位，但就仍處於最高的三分之一。有勞工界議員鬧爆羅「計呢啲數無意思」，因為事實上大部分市民都分享唔到經濟成果，貧富差距愈見嚴重，促政府負上責任，決心解決問題。

羅致光尋日喺網誌話政府統計處喺2007年前，只公布稅前同福利轉移前嘅堅尼系數，有關數字已經深入民心；即使其後每5年公布其他堅尼系數數字，一般學者、傳媒同時事評論員仍然習慣採用香港稅前同福利轉移前嘅堅尼系數，同其他已發展國家或地區嘅除稅同福利轉移後嘅堅尼系數比較，作為評論政府政策嘅前提，認為係「蘋果與橙的比較，習非成是」。

大部分人無法分享經濟增長

佢又話香港嘅稅前同福利轉移前嘅堅尼系數，同其他已發展國家或地區，相同計法嘅堅尼系數大致相若。而瑞士洛桑國際管理學院今年發表嘅《世界競爭力年報》，改用香港嘅除稅同福利轉移後有經濟活動住戶人均收入嘅堅尼系數後，香港排名上升12位，排行第48位，希望外界分析同評論時，採取一個客觀同較公平嘅比較咁話喎。

搬呢個計算方法出嚟，顯示排名上升，無非都係想反駁港府愈扶愈貧嘅講法。之不過，勞工界就唔太受落嘞！勞工界議員潘兆平話香港貧富差距愈見嚴重，唔單止基層工友，近年中產階層都難以向上流動，批評羅致光「計呢啲數無意思」，因大部分市民無法分享經濟增長的成果，生活質素同幸福感亦隨之下降，相信如果長此下去，港人只會對政府及社會愈來愈不滿。

潘兆平認為有責任嘅政府應決心解決問題；即使目前面對疫情來襲，亦應先訂立扶貧目標，例如提升住屋同教育福利嘅時間表。