政情：傾盆暴雨浸死豬 陳月明：排水問題須解決

香港雖號稱先進地區，不過部分鄉郊地方嘅排水系統仍十分落後，一旦遇上豪雨就頓成澤國。北區區議員陳月明日前喺社交平台大吐苦水，指打鼓嶺受到連日來嘅暴雨影響，出現大範圍水浸，情況較3年前嘅颱風山竹更嚴重，當中就有豬場遭到傾盆暴雨所淹沒，死咗14頭豬，包括懷孕嘅豬媽媽，而幸存嘅豬隻亦有機會因不潔水質而受感染，善後工作十分艱巨，都可謂「陰功豬」囉。