政情：強制外賣走塑 張宇人轟諮詢濫做

張形容今次諮詢文件係「假諮詢」，事關所列出嘅問題太過片面，譬如問市民贊唔贊成立法管制即棄膠餐具，等同係「阿媽係女人」嘅問題，邊個會唔支持呢？張又話環境局曾指替代餐具雖標榜可降解，但製作過程都有添加物質，仍然係唔合格，佢希望局方能列明替代物料應依循邊個外國標準以達致對環境無害嘅目標。張又批評政府意圖透過諮詢嘅形式，數夠票就立法管制嘅做法。佢話日後會同環境局會面商討方案，仲想教局方重新寫過份諮詢文件添。

張又關注有關計劃若落實後所引起嘅成本問題。因為當餐廳向外賣客提供成本較高嘅環保餐具，同時索取額外費用時，市民先至會驚覺實際支出上升，對於原本買個飯盒已經掹掹緊嘅基層市民，加幾蚊可能會令佢哋食唔起飯啊，從而驅使慳得就慳嘅市民幫襯超市。張強調管制即棄膠餐具若只針對食肆係無補於事，不但無法減低環境影響，仲會令已賺到盆滿缽滿嘅零售大集團繼續肚滿腸肥。

就張宇人對於管制即棄膠餐具嘅憂慮，世界綠色組織行政總裁余遠騁就另有見解，佢話歐盟已通過禁止即棄膠餐具嘅法案，當偌大嘅歐洲市場都可以落實禁用，點解香港唔可以呢？雖然目前替代餐具成本的確較高，但余深信只要得到市場普遍採用，量產化之下價格必定下降，更何況香港管制即棄膠餐具嘅建議將來就算落實，歐洲採用替代餐具都已經好幾年啦！所謂令基層人士連飯盒都食唔起嘅講法，未免言重。余又提到內地都開始取締發泡膠飯盒，反觀香港喺呢方面真係好落後囉。