政情：青發委員 體育發展支援不足 應設運動政策局

雖則街上清潔事務應該由食物環境衞生署負責，但係林琳提到民政局有時都要落水、牽頭管埋清潔問題，仲有街邊樹木等，實在管太多嘢，以致支援體育方面唔夠專門。林琳提到好多外國政府都專門設立青年及運動政策局，因為有見運動員大多都係約莫30歲嘅年輕人，成立有關政策局就可以一石二鳥，專注負責青年運動事務喇。另外，香港政府近年積極推動創科發展，林琳認為創科亦包含運動支援，例如可以參照外國，引入更多幫助分析肌肉組織、選手狀態等嘅科技。

奧運熱潮仲勾起林琳學生時代嘅回憶，原來佢都係運動好手，喺香港就讀中學嗰陣參加過游泳、排球同乒乓波校隊。不過去到澳洲留學時，見到外國人唔止游水唔需要泳鏡，直接跳落水，仲要連個身都長過佢就放棄咗喇！

上屆政府早已提出架構重組建議，包括喺民政事務局中分拆出文化局。不過由於泛民主派喺立法會拉布被迫擱置計劃，轉眼間已經過咗大約10年，計劃已經不了了之，而本屆政府仲表明無意成立文化局添。至於體育支援方面，政府亦早喺2012年提出開設體育專員一職，不過政府官員之後提出體育專員並非問責官員層次，要再研究職位嘅級別定位。擾攘大約一年半，時任官員竟然話經過研究後初步認為設立職位並唔可行，因為要物色嚟自體育界人士統領各方持份者並唔容易喎。當大家認為計劃胎死腹中，政府到2016年又突然落實設立體育專員一職，可謂反覆無常啊。