昔日東方政情：穆家駿捱批 Fb專頁被關閉
亂轟羽球一哥波衫冇區旗
東京奧運上周開幕，公眾都關注香港隊運動員嘅表現。不過身兼民建聯成員嘅中學老師穆家駿前日就喺Facebook專頁上貼文，「強烈譴責」香港羽毛球「一哥」伍家朗喺出戰男單分組賽時身穿球衣冇印上香港區旗標誌嘅球衣。雖然佢同所屬政黨事後補鑊，但依然引起網民不滿及要求穆道歉，更有人發起檢舉其Fb行動。至尋日朝早就有網民發現穆家駿嘅Fb專頁已被關閉喇！
話說穆家駿尋日喺Fb貼文，話伍如果唔想代表香港出賽，可以選擇退賽，更指伍「黑衫黑褲參賽貽笑大方」。事件唔單止引嚟建制派關注外，伍更要親自喺社交平台發文解釋自己最近同贊助商完約，加上球衣未獲批准印上區旗，認為自己唔可以私自把區旗印喺衣服上，佢話已經積極處理緊事件。
網民發起檢舉行動
事後事件繼續發酵，香港羽毛球總會發聲明解釋事件，民建聯亦透過議員張國鈞Fb貼文回應事件，但就冇為穆嘅事件向伍致歉，反而批評香港羽毛球總會安排欠周全，以致社會人士產生不必要誤會喎，畀外界觀感係試圖扭轉「風向」，將矛頭指向羽總。
穆都喺Fb轉載羽總聲明，話終於等到羽總嘅聲明，大家都清楚事件真相，希望伍下場比賽可着上有區旗嘅球衣參賽，仲預祝對方取得佳績。似乎佢都嘗試為事件補鑊，可惜一班網民唔收貨，有人發起檢舉其Fb行動。至尋日朝早有網民嘗試開啟其Fb專頁時，就顯示「無法瀏覽此頁面」。
所屬政黨拆彈失敗
由於穆為教師，教育局局長楊潤雄被問及事件時，就話如果局方收到有關投訴將按程序處理，但佢就唔會公開評論事件喇，希望公眾以平常心、按事實評論事件。港協暨奧委會亦回應事件，指個別運動項目比賽時所着嘅服飾，就按運動需要同比賽要求，由運動員所屬嘅體育總會協調同統籌。
其實唔理運動員參賽服飾應該由邊個準備，公眾都應該先了解清楚事件先作出評論，依家外界質疑穆「跟車太貼」，民建聯明顯「拆彈」失敗，唔單止引起不必要嘅爭議同口水戰，更會影響運動員表現啊！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
