政情：廁所仆親 陳肇始紮繃帶成個月

陳肇始上月被影到左手受傷，當時佢嘅新聞秘書就冇交代喺咩情況下受傷，只係話冇影響工作。陳尋日親自解畫，話因為辦公室廁所地下濕滑，所以一唔小心就跣親跌倒，但好彩傷勢唔算嚴重，並冇骨折。

不過，佢似乎一直都咁黑仔，前年3月出席一個公開活動嘅途中，唔小心喺公眾地方升降機入面跣親，有輕微骨裂，並觸及手腕舊患，需要送院治療，打完石膏返屋企休息。另一次就喺2015年10月，當時任食衞局副局長嘅佢喺健身時失平衡跌倒，右手虎口位舟骨骨裂，要用護腕固定右手，仲要接受為期6星期嘅治療。