獄中擁抱囚友違規 袁嘉蔚罰坐「水飯房」10日

話說袁嘉蔚嘅社交平台專頁尋日透露，袁同相熟囚友擁抱之後，佢同5名同倉囚友被罰獨囚「水飯房」10日。貼文引述懲教人員解釋，話處分理由係「與其他囚犯有身體接觸」，但「已經罰少咗」，因為「攬一個人罰5日，依家只係當你（袁嘉蔚）攬咗兩個人」。貼文又指袁隔離囚禁期間唔能夠「食私飯」、收取信件，唔可以閱讀書籍等，質疑係剝奪袁所有福利。

有消息人士透露，袁當日由定罪犯轉為還押犯，當佢被帶往還押犯嘅活動室時，有幾名之前認識嘅還押犯舉自製紙牌歡迎佢，又互相擁抱，呢個情況喺監獄內從未發生過。內行人一睇就知，呢個情況觸動保安紅線，佢以為係六、七十年代監獄風雲，好明顯袁喺該組還押犯形成一股勢力，並公然作出有關舉動。據悉，署長胡英明即時下令要瓦解呢股勢力，相信袁等人會繼續被隔離。