昔日東方政情：加快審議劏房租管 議員暑假或要開會
本港公屋供不應求，好多基層市民無奈屈居劏房，又要應付昂貴租金。政府提出《2021年業主與租客（綜合）（修訂）條例草案》為租金加幅封頂。雖則議員準備放暑假，但顧及到條例草案嘅迫切性，計劃同運輸及房屋局商量喺暑假期間加開會議。
張宇人叫唔出陳振英個名
有關委員會尋日召開首次會議，由議員鄭泳舜以及容海恩分別自動當選主席及副主席。委員一致認為應喺三個星期暑假內繼續開會，趕及復會時就可以提交內務委員會同大會審議，以爭取早日通過條例。鄭泳舜話會同局方商量加開一至兩次會議，另外由於疫情關係，會邀請公眾喺網上提交意見。
話說會議一開始就發生蝦碌情況，由在席最資深嘅議員張宇人主持選舉程序，當佢複述鄭泳舜被提名時，就講錯做「謝泳舜」。點知之後由坐最後排嘅議員陳振英和議時，張竟然認唔到佢，話「嗰個叫陳……」。似乎要由隔籬嘅立法會秘書提水，佢先講得出陳振英個名，仲話返佢轉頭，話坐咁遠做咩？「睇唔到你，記得你姓陳已經好威！」
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
