政情：東奧睇中國女排 陳恒鑌肉緊扮扣殺

好多議員分享對中國女排嘅熱愛，不過最投入嘅莫過於議員陳恒鑌（Ben）。佢烏低身、伸長雙手準備接波，仲要自己配埋音添。佢提到中國女排多年嚟都係體壇佳話，每一次有比賽都特別留意，又點名話欣賞中國女排隊長朱婷嘅扣殺同攔網能力。講到呢度，Ben又忍唔住扮扣殺同攔網，睇嚟佢好想參與其中喎！至於議員周浩鼎同樣支持中國女排，因為佢之前睇咗一套電影，講述中國女排嘅感人、勵志奮鬥史呀。

議員何俊賢就另有見解，話一早估到多數議員都係最鍾意中國女排。佢自己就鍾意體操隊，尤其是女子高低槓項目，選手好似花蝴蝶咁飛嚟飛去，話只係睇分幾鐘都值回票價！體操仲有另一個捧場者，就係議員陳克勤，佢形容體操選手好似釘一樣穩站喺場地。佢仲好鍾意睇跳水項目，提到反身翻騰三周半，運動員落水幾乎零水花，一定攞到滿分啦！